كلمه السر

ليه احنا مش زى الصحابه ....جيلنا جيل فاحش وداعر وفاسق ......فين ايام اما كان الشاب عنده 18 سنه وبيقود معركه مش زيك يا خايب عندك 20 وقاعد على النت !!
جمل كتير بترمى بالتهم علينا واحنا مصدقين وبنتحسر على نفسنا بس الحقيقه مش كدا خالص
.........
احنا مش زى الصحابه لان الصحابه كانو معظمهم كفار قبل الاسلام ومنهم من مارس الشعائر الدينيه قبل الاسلام ثم بعد ذلك ربنا هادهم عن طريق الرسول صلى الله عليه وسلم الى الاسلام بعد اقناعهم وبعد الاجابه عن ما يشغلهم
هؤلاء قوم فكروا فأهتدوا اما نحن فمنا من هو مسلم لانه فقط يمتلك ابوين مسلمين و يحظى باسم مسلم 
علاوة على ذلك كيف تقارن جيل عاش بينه الرسول (ص) يجيب عن اسئلتهم ويستشيرونه ويفتيهم لا مجال للفتنه ولا مجال للخطأ وجيل جاء بعده بالف وربعمائه سنه يوجد بينه مليون مفتى منهم الجاهل والمنتفع والمنافق
عايز اتعلم دينى وابحث اكتر 

السعاده الوهميه

هناك اسباب كثيره للسعاده منها ما يكون مصدره المال ومنها ما يكون معنوى ولكن السعاده فى تعريف بسيط هو الميل لشئ يجلب النفع لك
نسبه تحضر الدول والمدن قديما وحديثا تقاس بالسعاده
فى مصر ...مشاكل البلاد السياسيه والاقتصاديه وتدنى مستوى المعيشه والبطاله و الاحباط و الفراغ و فقدان الاهداف تحول دون السعاده
فلذلك نلجأ لها بطريقه وهميه وهى التعصب الاعمى لنادى معين
*طبعا انا اهلاوى وبحب النادى الاهلى لكن انا بتكلم فى العموم يعنى مجرد فكره فى دماغى *
فقدان الثقه فى القياده السياسيه وفقدان الانتماء للبلد و فقر الانجازات الحقيقيه هى من تدفع الانسان الى الانتماء لنادى معين حنى لو منعه هذا النادى من دخول بواباته للاستمتاع بالخدمات التى يقدمها النادى على المستوى الاجتماعى 
بسبب فقره الشديد
اعضاء نوادى الاهلى والزمالك ووادى دجله وبلديه المحله كلهم بلا استثناء من رجال الاعمال والوزراء السابقين واصحاب الاموال واسرهم ولا يوجد فيها مكان للفقراء والمهمشين و الطبقه المتوسطه
وعلى الرغم من ذلك تجد اغلب المدرجات والكافيهات تعج بالطلاب والعمال يهتفون بحرقه باسم النادى الذي لو زاروه فى مره سيرميهم على بواباته خاسرين
الانسان بطبيعته يحتاج لقائد يمجده ويطبل له و يؤيده فيختار رئيس النادى او المدير الفنى او لاعب معين
ويتابع اخباره ويؤيده فى قراراته ويسير ورائه وهو لا يستطيع ان يكسب ثمن اطار سيارته
بل ان حديقه هذا الانسان وحيواناته تعيش اكثر رفاهيةً من المشجع الاعمى المتعصب
فكروا....وحطوا مجهودتكم وتفكيركم فى المكان الصح

الاحزاب المغربيه

الفتره القادمه سوف أقرأ عن تاريخ هذه البلد العظيمه المتقدمه البلد العربى التى تخضع للنظام الملكى الدستورى الديموقراطى
تابعت فى الفتره الاخيره كيفيه استعداد المغرب للانتخابات وطبعا لن يكون حكمى صحيحا 100% لكونى لست مغربيا لا اعرف الديموغرافيه الصحيحه للسكان ولكن ما تابعته فى الصحف العالميه وخاصه صحيف "هنا صوتك" الهولنديه الناطقه بالعربيه
ادهشنى !!
ادهشنى وجود الاحزاب القوى و الفعال فى المجتمع المغربى و معرفه كل حزب ان دوره تشريعى و ليس خدمى
احترام كل حزب ناخبيه وتقديم لهم برنامج يتماشى مع توجهاته سواء كان بسارى او يمينى
ترى كل مواطن فى المغرب يؤيد حزب على حسب توجهه
المواطن المغربى من اعلى المواطنين العرب ثقافه بالطبع فلا تجد حزبا يوزع الزيت والسكر ولا مرشحا يوعد ناخبيه باصلاح وتوصيل المياه العذبه لقريته
ادهشنى موقع هنا صوتك بالخدمه التى يقدمها للمواطنين بالاجابه عن بعض الاسئله ويعطيك فى النهايه الحزب القريب لوجه نظرك
لذلك تعترف الصحف الهولنديه ان لكل حزب مغربى توجهه مختلف واستراتيجيه وبرنامج وفكر مختلف عن الاخر
معظم الاحزاب لها جرائد حزبيه وهذا ما نفتقده فى مصر !!
صحيح نحن نفتقد فى مصر وجود الاحزاب اصلا فاين السبيل لوجود جريده !!!
كتبت تغريده على تويتر اننى اريد ان اخذ الجنسيه المغربيه و اشارك فى الانتخابات وارجع تانى
انا متحمس و سعيد بوجود بلد قويه سياسيا و اقتصاديا مثل المغرب لا يحكمها جنرالات الجيش
سعيد بزياده الوعى بين المواطنين وتمسكهم بالقيم الدينيه والاجتماعيه لبلدهم
ومثال على ذلك تجد كل حزب بكتب اسمه باللغه العربيه ثم اللغه الامازيغيه ثم الفرنسيه
احزاب متنوعه وليست غرفتين وصاله مثل مصر
هذه الحاله الحزبيه تذكرنى بمصر قبل انقلاب يوليو وحل الاحزاب السياسيه
10 احزاب مغربيه فعاله يقدمون برامج متنوعه ومقالات لكتاب يوميا تثرى الحياه الفكريه

دوله ملكيه نعم ...ولكننى ارى انها ليست دوله الصوت الواحد 

فى حب دوله المغرب 

دمتم

الدنيا من منظور من فقد عين واحده

تلقيت الرصاصه بصدر رحب خلال الاشتباك فدى بلادى والحريه بعد ما الطبيب عالجها نزلت كملت هتافى
كنت اسمى بالبطل خلال هذا الشهر
هتافات الناس باسمى كلامهم عنى فى الاعلام نسانى الاصابه ...نور بصيرتى ...افرحنى ....جعلنى مفتخرا بالعين المفقوءه
سنقدم الجانى للمحاكمه ....الشعب كله ورائى
لم اعد اقدر على رؤيه ساعه الحائط وانا اشاهد التلفاز الا عندما احرك رقبتى ناحيتها ...هذا لا يهم
ارتدى النظارات السوداء باليل والنهار حتى لا اؤذى مشاعر من ناضلت و ضحيت لألجهم ....و ما المشكله
انا مهندس الكترونيات ...رسبت فى المقابله لشركه معروفه رغم تفوقى بسبب عينى ..... لا ابالى سأفتح محلى الخاص
الناس ما زالو يدونون عنى على الانتر نت يتحدثون عنى فى الشوارع
يرسمون لى الجرافيتى ...يغنون لى الاشعار
"اترى حين افقأ عينيك واثبت مكانهما جوهرتين
هل ترى ؟؟؟
هى اشياء لا تشترى
اسبوعيا اغدو ضيفا على احد البرامج التلفزيونيه الهامه
مرت الايام والشهور حالتى الماديه اصبحت صعبه ليتنى كنت قبلت فى الشركه كنت الان امتلك الالاف والشقق
تزوجت رفيقتى من الميدان وتركتنى لاننى لم استطيع ان اعولها
مرت السنين اصبحت ثورتى تسب فى التلفاز من اناس لم يعرفوا فى حياتهم الا رائحه النقود والنفوذ
نسانى اصدقائى واحبائى
عشت بالنظاره السوداء كى لا اجرح مشاعرهم
انا غير راضى
اريد عينى ولا اريد حريه لقومى فهى اشياء لا تشترى 

بتخيل نفسى معاهم

الساعه التاسعه مساءً يوم الجمعه 18 نوفمبر  و الاجواء هادئه فى ميدان التحرير الثوار مصممين على البقاء وتنفيذ مطالبهم يقف مجموعه من الشباب فى المداخل المؤديه للميدان للحراسه الجرافيتى يغطى الجدران الماره يتعاملون بلطف مع الشباب الا من بعض المشادات الكلاميه بين احد الشباب و المعارضين الشرفاء او المدفوعين كل شئ على ما يرام ...

طبعا انا بنام بدرى فقولت هنام ع الساعه 12 كدا وسيبت اصحابى اللى كان بيغنى واللى كان بيكتب واللى كانوا بيتكلموا 

فى الصباح يوم السبت 19 نوفمبر صحيت الساعه 7  الصبح لقيت طبعا نص الشباب نايم و وناس بتعمل الفطار و اتعرف احمد شاب عنده 23 سنه تقريبا فى نفس سن بعض ...
الساعه التاسعه حركه غريبه لا تنذر بخير مئات من افراد الشرطه العسكريه والامن المركزى يتجمعون عن المداخل وبدأ الضرب بالخرطوش و الغاز المسيل للدموع وقع مصاب بطلق خرطوش فى كتفه وبحكم انى طبيب امتياز لبست البلطو الابيض واخذت عدد من المطهرات والشاش الابيض و عده الاسعافات الاوليه و جريت عليه انا واتنين من الشباب
-شيلوا المصاب بسرعه وهاتوه الخيمه بتاعى معايا
اخذنا الشاب فى الامان وبدأت فى تطهير جرحه و لفها بالشاش والحمد لله اصابه طفيفه
اضرم الثوار النيران فى بعض سيارات الامن المركزى وبدأ الميدان يقع تحت سيطره الشرطه
فى حوالى الساعه 12 ظ تحول الوضع لاشبه بالحرب بل اشد الجنود يطلقون النار على المصريين فى موقف لا يتكرر كثير من الاصابات
مالك اصيب فى عينه لم نستطع اسعافه للاسف
كثيرا من الصحفيين اصيبوا
صراخ يأتى من بعيد هرعنا اليهم لم اصدق عينى احمد صاحبى شايلينه ...
-بسرعه دخلوه الخيمه يا جدعان
الاصابه خطيره فى الدماغ معنا كثيرا من الاطباء اساعدهم تحولت الخيمه الى مستشفى ميدانى
-الراجل بيموت يا جماعه
انقطع النبض مات فى ايدينا ولم نفعل اى شئ
توقف الضرب خسرنا واحد من افضل الشباب صاحبى لمده يوم
و لم ننم ليلتها
غدرت القوات ثانى يوم بالشباب ودخلت من ناحيه محمد محمود و القصر العينى
الاعلام يروج اننا مجموعه من البلطجيه و العملاء
لم اشارك فى الضرب بل انطلقت مسجد الرحمن اسعف المصابين فقد تحول مسجد الرحمن وكنيسه قصر الدوباره و مسجد عمر مكرم الى مستشفيات ميدانيه
الاف المصابين بالخرطوش والاختناق نتيجه كثافه الغاز
بدأت القوات فى استعمال الرصاص الحى وسقط مئات الشهداء لم نستطيع اسعافهم
 ارتفعت أعداد المصابين مع نهاية اليوم إلي 1902 مصاب و24 قتيل من المتظاهرين هي حصيله يومان من الحرب الضاريه 
*هذه المشاهد تخيليه بتخيل انى كنت معاهم الاحداث الوارده حقيقيه ولكن انا مكنتش موجود*

شيزوميديا

ليه بواجه صعوبه في التعامل مع شخص تعاملت معاه لمده سنين ع السوشيال ميديا اما اقابله في الحقيقه ?
ببساطه لاني بتعامل مع مجرد مربع شات ابيض وصوره بروفايل خاليه من اي تعبيرات وكلام مكتوب خاليه من اي نبرات صوت
المشاعر عباره عن رموز  صفرا بايخه
الشخص اللي بتاعمل معاه عباره عن شخصين…  شخص بتعامل معاه بقالي سنين بينا مواضيع ومواقف بسأل عليه متابعه
وشخص حقيقي بشوفه من بعيد متكلمتش معاه  الا كلمتين ورد غطاهم
او شخص عمري ما شوفت الا صوره بروفايله الجانب اللي عاوز يورهولي من وجهه وهو في احسن حالاته
طبيعي اني اتكلم ع النت بكل طلاقه واكون في الحقيقه خجول جدا معاك !

ازاز خاص

اتولدت بنظر 6/6 وكان بيجيلى خاطر وانا صغير ان النظر الى ما لانهايه يعنى لو مفيش عمارات ولا شجر كان زمانى شوفت اخر الدنيا كنت بقول ليه الصقر متميز بالنظر ؟
يفرق عنى فى ايه ...لو مفيش العماره الطويله اللى قدام بيتنا دى كان زمانى بشوف الهرم .
كنت بستغرب اللى بيلبسوا "نظارات" ومش عاف بيحسوا بايه يعنى ؟
يعنى ايه نظر ضعيف مش حاسس الاحساس ده !
كنت مفكر بيعملوا كدا عشان يلحقوا التخته الاولى فى الفصل "حجه عنى"
ايه الفرق بين ازاز شباك العربيه وازاز النضاره ....كان سوال بيلح عليا
مكنتش متخيل فى يوم من الايام انى ممكن احس احساس ضعف النظر ...طعا احساس تافه وملايين البشر عايشين بنظارات بس انا حبيت اول تدوينه على المدونه دى بعد اما التانيه قفلت لقله المشاراكات تكون عن نظارتى
كان اول مره احسه كان فى درس رياضه وكنت قاعد فى وسط الفصل كدا
كنت بحسب الناس كلها زيي فى النظر العالم هو اللى باهت ومزغلل العيب مش منى انا ...! 
الاستاذ وقفنى احل مسأله طبعا انا بشوف بصعوبه جدا قلت على الاتنين تسعه و على السته تلاته الفصل كله قعد يضحك عليا
ضحكت معاهم طبعا والاستاذ الله يسامحه قعد يتريق لكن انا من طبعى مبيهمنيش رأى حد "وده حقيقى" مش عنتريه
انا فعلا صعب اسمع رأى او نصيحه حتى لو صح
واما روحت قلت لابويا ....مصدقنيش وبيحسبنى عايز البسها تغيير
جابلى نظاره حفظ نظر ...لبستها محستش بتغيير فقولت خلاص العيب مش منى العالم اللى كدا يا اخى اعمل ايه ؟
روحت الدرس قعد ورا مشفتش برضو ..!
روحت لابويا خدنى للدكتور وبعد الكشف
الدكتور قالى انت عايش ازاى يا بنى بجد ؟
قلتله عادى كنت مفكر العالم اللى مزغلل ادانى النظاره اللى بيكشف عليا بيها وقالى ايه رايك
حسيت بجد ان العالم حلو كل حاجه حلوه لوحه سوره الفلق اللى فى العياده بتلمع جدا
ابويا شكله حلو واخواتى ....الناس بتلمع
عملت النظاره واخترت الشنبر روحت البيت قعد اذاكر الكلام اللى فى الكتاب واضح
نزلت الصبح
الاشجار خضرا و السما زرقا
الحياه اجمل من ورا ازاز النظاره اللى اكتشفت انه مختلف تماما عن ازاز العربيه